បាល់ទាត់៖ កីឡាការិនី យ៉ុន យ៉ើន ថាម្ចាស់ផ្ទះឡាវទទួលយ៉ាងកក់ក្តៅ

 

បន្ទាប់ពីទៅដល់ប្រទេសឡាវខ្សែប្រយុទ្ធរបស់ក្រុមបាល់ទាត់នារី ណាហ្គាវើលដ៍ យ៉ុន យ៉ើន សម្តែងអារម្មណ៍រំភើបដែលខ្លួនបានក្លាយជាកីឡាការិនីកម្ពុជាដំបូងគេដែលចេញប្រកបអាជីពបាល់ទាត់ក្រៅស្រុក។ ឆ្លើយតបតាមសារមកកាន់ YTN.KH កញ្ញា យ៉ើន ប្រាប់ថាការទៅដល់ប្រទេសឡាវ គឺទទួលបានការគាំទ្រ និងស្វាគមន៍យ៉ាងកក់ក្តៅចំពោះនាងក្នុងនាមជាសមាជិកថ្មី។

«ខ្ញុំមានអារម្មណ៍ថាសប្បាយចិត្ត រីករាយដែលមានឱកាសចូលរួមជាមួយក្រុមបាល់ទាត់លីគនារីឡាវ(Young Elephants FC)។ ការទទួលរាក់ទាក់បានល្អ»។ ខ្សែប្រយុទ្ធរបស់ក្រុមបាល់ទាត់នារីកម្ពុជា លើកឡើងដូច្នេះ និងនាងថាតែពិបាកក្នុងការប្រើភាសា។ កញ្ញា យ៉ុន យ៉ើន និយាយថា៖«ទំនាក់ទំនងរៀងពិបាកភាសា»។



កីឡាការិនី យ៉ុន យ៉ើន មានអាយុ ២៤ឆ្នាំកើតនៅខេត្តកំពង់ស្ពឺ។ យ៉ើន បានជាប់ជាកីឡាការិនីលេងឱ្យជម្រើសជាតិកម្ពុជា នៅឆ្នាំ២០១៤ ក្នុងថ្នាលអាយុក្រោម១៤ឆ្នាំ។  យ៉ុន យ៉ើន ជាប្រធានក្រុមក្លិបបាល់ទាត់នារីណាហ្គាវើលដ៍  និងជាសមាជិកដ៏សំខាន់របស់ក្រុមបាល់ទាត់ជម្រើសជាតិនារីកម្ពុជា នាងបានទៅដល់ប្រទេសឡាវ កាលពីថ្ងៃសុក្រ ទី០៥ ខែកក្កដា ឆ្នាំ២០២៤ ដើម្បីត្រៀមចូលរួមជាមួយក្លឹបបាល់ទាត់ឡាវ Young Elephants FC(women)។ ការទៅចូលរួមរបស់ខ្សែប្រយុទ្ធជម្រើសជាតិកម្ពុជារូបនេះគឺ​ក្នុង​លក្ខខ័ណ្ឌ​ខ្ចី​ជើង​ ព្រឹត្តិការណ៍​​ប្រកួត​វគ្គ​បឋម ​នៃ​ការ​ប្រកួត​កីឡា​បាល់ទាត់​នារី​របស់​សហព័ន្ធ​បាល់ទាត់​អាស៊ី (AFC)  AFC Women's Club Championship Preliminary Stage។

កញ្ញា យ៉ុន យ៉ើន(កណ្តាល) និងមិត្តរួមក្លិប/រូបពី Fb